Una de le vile venete pi setentrionale, dassen ugnola nte la so soada de crode Dolomiti agordine. Descoron de n grant casament, logà ntel cor de Agort e resultà de secoi de slargament e mudament. L so valch l é chela de esse tant palaz che mason de campagna: con n carater pi formal da la banda de la piaza, e che se verz a na dimension pi bacana da la banda del giardin. La posizion geografica, da inte de n loch alpin, la el renz una de le “ponte” de penetrazion pi a nord de la cultura veneta, de sto tant, e l s’avea inascort anca Dino Buzzati co la so citazion “La ultima onda de la Serenissima che la se franz e la mor ai pie de le maestose catedrai de crepa del Nord [L’ultima onda della Serenissima che si rompe e muore ai piedi delle maestose cattedrali rocciose del Nord]”. La val del Cordegol l era n pont emportant, via per ndà su inte a nord e loch de barat coi teritor na olta controlai dal Vescof-Cont de Persenon e Trent e podopo dal Imper Asburgico. A demostrazion pi granda de sto ligam, ntel 1820 l imperador d’Austria l gh’avea conferì l titol nobiliar a la famea de’ Manzoni come recognossenza per l damagnà e i schei che i gh’avea dat ai temp de la guera. L palaz l à prinzipio da l’union (portada inte da Francesco Crotta,) dei loch dei Pieroboni (colà dal 1365) e dei Paragatta che i avea metù su l toch nta mez del ‘500 de la vila. I slargament del ‘600 i ciapa inte aldelà che l nof corp oriental, anca la forestaria e l portech metui a sud. Da chel alter vers, la é del ‘700 la ala de rapresentanza fata su da la banda de la piaza e dontada auna dal piciol cesural fornì su da sedes pop ciamai da la dent i “Mut/Pop del Grota”. L é l 1813 co Giuseppe Manzoni l compera da Pietro Crotta l palaz che l deventarà loch da d’istà, onde che i artisti i se binea, anter chesti anca Giuseppe Segusini. I é soi i intervent de comedament del scalon prinzipal e l proget de la Pica che l é l padilion embesol via en cao al giardin fat su en stil “gotich modern”. Da inte, anter le desferente opre caton dei afresch de Pietro Paoletti e la careola pala d’altar atribuida a la scola del Frigimelica savaiada via inte la capela del palaz.