L Broi, l larch taren de erba logà ntel cor del paes, l é un dei simboi pi carateristizi de Agort. L gnom l coresponz al talian “brolo, orto” e l ven en ca dal latin “broleus”, fazile da n emprest linguistich celtich. Sto gran pra de zirca n etaro l à encoi tut dintorn na dopia stricola de alber de cassia e l é doprà tant che parchet per la dent e da ambietazion per manifestazioi emportante locale (Vecia Popa, Sagra de San Piero, Palio dei 100, Fiera del Bestiam). L é nassù ntel Bas Medioevo tant che l zenter de la curtis vescovila agordina sot a la giurisdizion del vesco de Belun e de chest se ghen descor nte na bola de papa Lucio III del 1183. L é documentà dal 1394 come “Broleus Agurdi” e nte le desene de ani drio l vesco l à conzedù zerte part a emportante fameie agordine per i so camp e i so cuartier, a cont de na predial ogni an (anter de cheste l é stat fazilmente anca l prenzipio de Palaz Grota-de’ Mandoni). Ntei temp pi vesin, se regorda come che endana la Prima Guera l era stat ocupà dai casot de le armade taliane onde che rivea anca n pèr de sine, capoligna de la Decauville Burban-Agort per l trasport del material. De tropi i se regorda encora come che enfin al prim mez Novezento l vegnisse daspes doprà da camp coltivai per fà inte al bisogn de magnà dei pi poaret. A l’entrada de la Piaza Granda (Piaza de la Libertà), l Broi l mostra fora l alt polon zitadin e na granda brenta de piera che su la so colona nta mez ciapa tron l Leon de San Marco, simbol de la Republica de Venezia, che la à guernà sti loch enfin a la rivada de Napoleon e al tratat de Campoformido (1797). Chesta piaza verda, ugnola nte la so sort nte le Dolomiti, l é n bon loch per calumà l panorama del staif anfiteater de zime dolomitiche dintornvia l Cadin de Agort, cossita come che pi dalonz a nord se riva a vede anca la Marmolada.