LA CIASA ONDE CHE L’E’ NASU’ EL BEATO ALBINO LUCIANI

La ciasa onde che l é nasù Papa Luciani l’é na costruzion del XVIII secolo, se la cata en te la zona zentral del paes. La ciasa, en prenzipio, la era fata da doi càneve e doi stanze a l prim piano (stua e ciasa). A l secondo piano, enveze, l era autre doi stanze, con en tabià e na stala tacai, onde che venia arlevade doi vache.

El pare del futuro papa, el Nane del Gnèlo (Giovanni Luciani), el se avea maridà en prim co sua dermàna Rosa Fiocco e da sto maridòz l era nasù doi pope sordomute. Daspò che la Rosa la é morta, el se ha maridà danof co la Bortola Tancon, e i a bu trei fioi: Albino, Edoardo (Berto) e Antonia (Nina).

Pò el Nane l ha conprà la ciasa entiera. Daspò che el Nane e la Bortola i é mancai e daspò l maridòz de la Nina, ente la vegia ciasa l é restà domài la nova famea del Berto Luziani, che nte l 1959 l ha tirà du el tabià e l ha slargà la ciasa par ghe fa loc a dodes fioi. Da alora la ciasa la ha ciapà la forma de ades. El futuro vesco Albino el tornarà cà daspéss a catà so fradel, sua cugnada e soi neodi e a se pausà calche dì, ente na stanza aposta par el. L’ultima bòta che l é venù l é stat ai 29 de dugn de l 1978.

Sò fradel l é stat nte ciasa enfin al 2008, cande che l é mòrt e po’ en fréo da rostógn soi neodi de l Albino. Par grazia de na donazion de l Cardinal Beniamino Stella, la Diocesi de Vittorio Veneto la l’ha conprada ente l doimila e disnof e ades la è vèrta e visitabile, aùna co l Museo dedicà a el, drio i orari pensai da la Fondazion Papa Luciani, che la la gestìs.

Davant ciasa l é n bèl prà. Du bàs l era na bòta la vecia stala e na caneva dorada dal pare de l Albino, el Nane de l Gnèlo, come laboratorio. Ades chesta l é deventàda l us par dì daìnte par le visite. A man zanca, a dì daìnte, l é la càneva. Le scale le porta su a la ciasa. Onde che l era l vège fornel encoi ghe n é un fat su nte l 1944 co le óle che venìa da Boldàn. La cardenza e la madia (el mobile par conservà le farine) l é ncora chi co l èra piciol don Albino, el rest dei mobili, enveze, i è stati vivui dal Albino Luciani cande che, da preve e vescovo, l era ospite de so fradel. Da la ciasa se passa ala stua, la unica stanza de la ciasa scaudada  da l fornel, conpagn de tute le ciase de le Dolomiti. Ente sta stanza l é nasù el piciol Albino el 17 de otober del 1912, che l é stat batedà da la méda Maria Fiocco par “imminente pericolo di vita”. Passà l pericol, el popo l é stat portà a l bàtem de la gesia de San Doàne, onde che l é stat fat le zerimonie che manchea.

El viàz el va diànt co la visita al pian de sora, onde che l é en poche de stanze: la camera onde che dormìa l Albino e l Berto, la camera de le sorele Nina e Amalia, la camera dei soi, la camera cenùda da banda par el vesco Luciani e chela onde che dormìa el Berto e la Antonietta, om e femena, coi so ricordi. Inte sot al quert l é na sala proiezion, enveze nte garas dabas l é una dele trei machine che Luciani l ha dorà co l stea a Venezia.